今日朝早，好忙、好忙、好忙。

還好，入左應該要入既野，依家可以做既，就係唯有等消息。

交左野，順手話比同事仔聽，雖然suppose佢係跟我做呢個project，但，佢上個星期成日因第二個project既事出差，都已經同呢個project脫左鈎。

今朝又真係想打人咁滯。有冇搞錯？日日返黎睇晒d八卦雜誌，唔係就讀埋個d 無厘拉謂美容書。呢個女人，今朝比d 野佢做，唔係係到嘈三嘈四，就係想唔做，我做好晒比你好唔好？你死架?! 再唔係，就係開到個手機大一大聲，但個人又成日唔係位走左去第二到傾計啦、八卦啦咁~~ 大佬，你唔係位就帶埋個手機走，都唔明點解有人有咁鬼多電話，係到破壞辦公室既寧靜。學舊同事話，真係睇唔過眼有d人，比野佢做就黑口黑面，做人不負責任，然後每個月可以拿兩個gucci袋走(ß講佢唔使做都有人工逗)。

我都唔明。

上星期，我既一位好同事終於係last day離職啦~~唉~~所以上個星期其實係有少少失落，亦都有少少唔開心。始終，我同佢咁close，又咁friend。人去樓空，依家佢得番個吉位。

於是，我都靜左好多、好多、好多、好多。

又終於，兩隻腳都好番晒好多。

早兩個月前，因為練習時激烈左少少，傷左左腳大腿肌肉，行路時，左腳有d痛，然後，抬唔起腿，每每跳舞時都要就住就住。

然後，過左一個月，左腳好番晒，仲比以前好好多。

然後唔夠一個星期，係上堂前拉筋時，又傷左右腳同一個位置。情況，係完全同左腳一樣。

就咁樣，落唔到一字馬，平時上堂同拉筋都要就住。

今次經驗多左，已經有準備知道發生咩事。

隔左兩個星期，情況已經好左，有進展，但我知道，還未時候。

昨日上堂，留意到自己好好多，臨返學前就先搵熱毛巾熱敷；拉筋既時候，就去慢慢落黎壓腿同做一字馬。Yeah~~好番晒~~~

雖然，我心知只係好番八、九成左右，仲要小心d唔好再拉傷。但，感覺真係好。

而且，其實我知道咩叫因禍得褔。之前傷左既左腳，其實未傷前係無咁軟，但好番之後，但好過之前。我相信我既右腳都應該會係咁，因為，依家既八九成，已經好過以前既十足。

 

欲速則不達啊~