4月18日 中午

Triple O's (金鐘金鐘道88號太古廣場二期LG1地庫009號舖(Great Food Hall))

是日中午朋友仔特登黎金鐘陪小妹食lunch。去左食OOO。其實無乜野特別，都係BURGER一個，但SIZE比其他既大，食到2個都好飽。

+++++++++++++++++++++++++++++++++++++++++++++++

4月18日 

Mr. Steak Cafe (旺角亞皆老街8號朗豪坊13樓2號)

是晚去睇street kings。開場前都要食飯，食泰國菜我又怕辣，最鐘意就係食個芒果椰汁糯米飯。結果最後男友仔話去食MR. STEAK。我見佢裝修環境都ok，諗住應該掂啦。點知……

呢間餐廳真係完全唔推薦。以呢個價錢，我覺得可以有更好待遇。由於我係剛跳完舞先出去，基本上都無乜胃口。我地只係叫左一個SET加個TIRAMISU。個tiramisu完全係因為個waiter話一定要每個人都要點少少，我聽到呢個已經好反感，乜依家唔比人無胃口架? ok，都算。諗住tiramisu都應該唔會有乜事。點知……

呢間餐廳不單止量唔得，連質都唔得。話叫做係mr. steak，個牛扒係既細又難食。半凍不熱咁，我食左一小塊已經更加無胃口。個前菜田螺算係比較正常少少。個龍蝦湯係ok，但你完全想像唔到係expresso咁既size。到個tiramisu上場。我個心諗，乜野黎架？要咖啡無咖啡味，要酒無酒味。

咁既價錢，我會expect要d好d既野。

食tiramisu，我始終最懷念IFC間Via Quadronno。

+++++++++++++++++++++++++++++++++++++++++++++++

4月20日晚

OUTBACK STEAKHOUSE (銅鑼灣百德新街22-36號翡翠明珠廣場2樓)

好野好野~ 又有我鐘意既OUTBACK食。

去到我男友仔就明我點解鐘意食OUTBACK。

因為一坐低，佢問我要點乜，我係選左全個MENU最貴個SET扒。其實我無睇過價錢。每次都只係食呢個，反正我又唔大食，2個人點個AUGUS 12OZ加埋SIDE DISH同埋SALAD剛剛好。2個人都點左個LEMON TEA，雖然話有REFILL, 我地都覺得唔太抵，茶無茶味又無檸檬味。唔知想點。建議下次一係唔飲，一係點可樂算。

無叫芝士薯條係一個飲恨…我要食魔鬼芝士薯條!!!!!!!

後話：最搞笑係今日去openrice睇食評，有個人寫得真係好搞笑，明明2個人去食，見人地可以refill，2個人只點1個lemon tea，個waiter同佢講，一杯lemon tea唔可以咁樣2個人share, 那個人竟然係到發難渣，話點解唔可以？好心啦~ 見人refill就諗埋d縮數，我會飲清水好過。唔好做到咁cheap好唔好？2個人都唔係細個，你話你一家大細，2小2大咁去外國買2杯飲品4個人分我都覺得ok，細路飲得幾多？但2個大人係cwb outback到做埋d咁既野，自己錯仲要大聲夾惡同人理論，呢d人真係結婚唔好生小朋友，無謂教壞下一代，真係失禮。慳左32蚊，賣左自己既人格同尊嚴比人。

+++++++++++++++++++++++++++++++++++++++++++++++

4月23日晚

板前壽司 (尖沙咀加連威老道14 號地下) 

係2007/08學年SEMESTER 2既最後一課。當晚考試。2個人放學後又係盪去食飯。經過板前壽司，見人少少就試下。老實講, 板前登陸香港咁耐，我真係一次都無去過。無他，唔想等咁耐嘛。次次睇個樣都似要等一百幾十年咁。

中間發生左D小插曲，完全進一步證明我同男友仔都有幾嚴重既階級主義。不過呢D中年婦人無品到咁，既然佢要”R”爛塊面，我絕對會豪比佢。

坐低男友仔已經係超肚餓。食左幾碟，我感覺上都開始明白點解呢間野會咁多人。

你問我係咪好好食呢？我覺得算一般OK啦。但係，如果只係出比元氣貴少少既價錢，可以食到好少少既野，完全係滿足香港人一貫想扮識食既心態，就可以理解點解會咁多人。我照睇MENU，呢間壽司店都有活魚供應，價錢唔算貴，只係一二百蚊既事。理論上就似有人同我講又一城個間稻穗亭係超級好味一樣。我既反應係……O 咀。唔係話唔好食，但我唔會用超級黎形容……ok，我認我咀刁。

值得一讚係店內員工服務態度好好，發生中年婦人事件，雖然完全唔關佢地事，但佢地都有再三同我地道歉。要比佢GOOD佢地！