4月5日 中午

魚一丁 (銅鑼灣告士打道280號世貿中心商場3 層312-313號舖)

中午約左男友仔黎呢到食lunch。已經有好耐無黎過。

感覺上覺得d lunch set水準跌左d,

叫左個魚生飯，又叫左個豚肉飯

以前d果物好似精緻d，依家無咁精緻。呢一餐算係不過不失咁啦~

++++++++++++++++++++++++++++++++++++++++++++++++++++++++++

峰壽司  (銅鑼灣軒尼詩道523-527號恆和鑽石大廈1樓)

峰壽司算係我係迴轉壽司中既心水選擇。

今日去，原以為六點半去到應該ok, 點知都係要等，好彩唔係等左好耐就有位。

男友仔鐘意坐迴轉枱。但香港既迴轉壽司有一個缺憾，就係唔知點解個迴轉帶上有本事來來去去都係個幾種食物。男友仔呢d半個日人又唔係太習慣用order紙。但整體係ok架~

++++++++++++++++++++++++++++++++++++++++++++++++++++++++++

阿拉麵館 (銅鑼灣告士打道280號世貿中心3 樓311號舖)

平日晚黎食已經唔算多人，仲要係7點左右，去到已經有位，好開心。

點左雞絲粉皮，男友仔同我都好鐘意食。等我下次整個愛心雞絲粉皮先得(係估唔到咁易整!)

五香牛肉麵 — 麻麻地。d牛肉好似怪怪咁，我始終都係鐘意尖咀個間台灣牛肉麵。

奶油鮮露筍 — 我係好鐘意食鮮露筍既。但呢個好似老左少少…有d根咁既感覺

2個人都唔係大食，食完去左食西環源記食糖水，d 芝麻糊係好香好滑又唔會太甜。正！

++++++++++++++++++++++++++++++++++++++++++++++++++++++++++

4月24日

翡翠拉麵小籠包 (銅鑼灣告士打道280號世貿中心2樓P209B號)

原以為ok, 點知唔得，男友仔食後即刻皮膚敏感，原因應該係味精。以後免問。

叫左個酸辣湯、小籠包、一客湯麵、同埋鎮江肴肉。

我要保護我男友仔!!!!!

始終最想念是花滿樓的香蕉拔絲。

++++++++++++++++++++++++++++++++++++++++++++++++++++++++++

4月27日

一門 (銅鑼灣軒尼詩道 502 號黃金廣場 4 字樓)

食壽司食得多，都要食下d熟食。

香港地最大問題係唔明點解d日本菜既熟食店, 如果d生食做得唔好，係永遠都做唔住既。笑笑係一個好例子。笑笑既熟食係ok架，但生食真係唔得。結果，成間無左。

好在我同男友仔都不會堅持食日本野一定要有生食(一d奇怪既香港人概念)。

昨日選左去一門，我地原本係諗住去日本吉列專門店，結果去到勁多人。其實我地已經去過三次而不得其入。結論係，我地一定要平日六點去拿位先會有得食。

最後去左一門，帶位小姐好好人。我地係walk in, 原來full晒架啦~ 但佢都肯幫我地”替”2個位比我地。我地答應會七點半交枱，結果我地7點多少少已經走左。叫左一個雜菌厚燒玉子，好香好滑。燒雞軟骨，無諗過得咁少，結果我地食完呢一碟再加碼2碟。海胆炒飯，炒得好香每粒飯都係分開唔係一”pat”既。外加2杯凍飲。埋單$310。都算係咁。