話說今天我上完芭蕾，打算先回家吃午飯再外出教琴。在中段大約有少許時間，我便趁機清洗花園。

真係好彩洗一洗，無意中比我發現係薰衣草附近，發現一隻大百足。其實呢到一直都知有百足，我都見過d BB 百足，但咁大條(照我所見應該粗過我大姆指，當然我又無真係拿隻手埋去比下…我幾勇都未勇到咁….!!)，又係屋企花園發現，真係第一次見(無錯….又係讚自己時間，我真係打埋屋企打理得好乾淨啊~)，應該係附近後山最近開始動土起樓，所以嚇走左D虫呱~

起初係打算用火燒死佢，點知呢，佢真係好醒呀~ 唔多肯走出黎，最後決定用”強水”(<-- 係咪咁寫架?!)。倒左全屋僅有既半支。

大功告成。

不過都夠驚險，因為最初我發現佢，而媽咪又走出花園睇下乜事既時候，條百足係向住屋企玻璃屋既方向行架…..好彩我用水喉噴走佢咋~ 而唔知死既小肥狗，竟然心口掛個勇字成日想走出真趁熱鬧，真係……

==============================

另，話說我真係好白痴地搬左入黎住左個幾兩個月，先知道原來我屋後有一對係香港樂壇既歌手夫婦連埋佢地今年先出世個仔同埋夫婦既屋企人係到住。

女歌手我諗我應該見過….因為話說係有一日既星期六，我放左ballet後返歸時，係村口有個女仔係咁望住我，我覺得佢有少少面熟但當時完全諗唔起係邊個，後尾要返到屋企之後一陣先諗….”丫….可能係佢喎….”。不過個女仔都好nice，一路都有同我微笑，我同佢點頭打招呼，佢都有同我點頭。

但話說我昨晚放ballet後返屋企，返屋企路線係會經過歌手夫婦門口(因為佢地住個間係我屋後面既斜對面嘛~)，咁我原本係一路行黑麻麻無留意，點知行到去歌手夫婦門口，發現有一名年約廿幾三十既男子(黑麻麻我真係見唔到佢個樣)，一路係到”怒啤”我咯~ 今次我醒啦…好快就估到係邊個。我估佢咁hostile，應該以為我係狗仔隊呱。但老實講我好不滿咯~ 真係好想講”邊差到有咁多狗仔隊想跟你呀？你以為自己係乜水??”。成條村咁大，有人行過有幾出奇呀？仲有呀~ 我都未懷疑你，你好日都唔會係條村到出現啦…我日日都準時返工準時返工，你估應該邊個驚邊個？

依家d 歌手真係無修養又唔大方。我舅父夠係artist啦，紅過你多多聲，但即使舊年我外公過世，有記者係靈堂訪問，大家都好大方丫。唔使咁嘛……