絕對有理由相信，我明年的桃花運一定大旺特旺。

因為，兆頭已經出來了。

差點給嚇死。

搭訕這種經驗，我可說是家常便飯。

最高峰的一年，平均每個月有一至兩次。後來成了名花有主，就減至每季一次吧。近一年已經幾乎沒有了，可能是因為老了的關係。而且，不止有搭訕男，還有搭訕女的。

今年，開斎，還要乘二。

簡單要用你老細來形容，原因是完全是沒水準的搭訕，按當勞叔叔所講，”幾乎是為了目的而無所不用其極，尤如當去酒吧溝女一般”。

先說昨晚的，話說我昨晚上完芭蕾舞課後下課慢慢走回家。到臨近村口的時間，身體經過一輛單車，車上男子向我say hello。我禮貌回應是因為我根本看不清他的面容，以為是”隔離屋個靚仔”(我家附近真的有一個靚仔，還要是很型的高大男。)，繼續回家路上，原來那搭訕男一直跟著我，開始搭訕。

搭訕男：”你叫乜野名呀? 我想同你做個朋友得唔得。”

我：”下？唔好啦….”

搭訕男：”你叫乜野名呀? 我可唔可以同你做個朋友呀….” (繼續死心不息)

我：”下？唔好啦….我又唔識你”

搭訕男：”你係到住架? 你係本地人? 我唔係成日係到架…我住xx架…我今晚練單車先黎咋…平時好少踩到黎呢到….我練單車好慘架…好辛苦架….不如你比你電話我丫….一係我比我電話你丫”

我已經開始唔理佢，心裡邊個句潛台詞係：”我完全、絕對、極度唔想同你做乜野朋友，最好連識都無謂。你好快d同我死開！“ 

嚇得我，可能佢都略有所聞我住個邊舊村係好互助的一條村，又或者可能係佢見我無反應，最後都走左。但，嚇得我真係好驚咯……驚到係到村既停車場兜左幾個圈，確定呢件騎呢搭訕男離開左之後，我先夠胆番屋企(費事比佢知我住邊，仲有排煩呀……)

好，跟住，今晚。搭訕男B。

晚上八點半左右，一個無caller display既電話。對方無出聲，最後我收左線。

十分鐘後，又一個無caller display既電話，對方依然無出聲，我最後又cut線。

再隔5分鐘左右，一個有caller display既電話，對方一開始話：”唔好意思，我唔知道個電話會通架…個電話係我以前女朋友用架…”

我已經勁奇怪，用不客氣既語氣問：”咁係幾耐之前既事?”

對方開始”口窒窒”。”唔……唔….呀….大約….大約年幾前左右啦….”

我用更加不客氣既語氣：”咁你一定講大話”

然後立即收線。

唔該，搭訕用下腦。

呢個電話number，我用左over 10年。而我好又肯定佢唔係我前男友咯……

well……其實我好想知，係咪呢d搭訕方式好易識到女仔呢？

咁多人鐘意用d咁無聊既方法?

呢d 搭訕招數，用係我身上，失敗率係100%。

“都唔知你乜頭乜路我會識你？對你有興趣？……你真係慳o的o啦……”