週末的方向

唔使諗，都係三步曲

星期五放工後超音速趕返舞蹈學校上堂

星期六上午學琴，跟住part time，跟住又係舞蹈學校上堂，八點先放學。

今日一早又係去上堂，晨咁早超身，朝早太陽唔晒，依家天氣好，用左二十分鐘行返去學校。

可能我住大埔太耐，好習慣行路。

但唔知點解，今個星期竟然覺得有好攰既感覺，可能真係太努力。而且搞笑，我星期拉筋拉傷左少少隻左腳，問題其實不大。只係……壓開左咯~ 本來左腳比較差，依家變左右腳差左。我仲同d 同學講，等我今晚又去拉傷埋隻右腳，咁樣慳好多時間。哈哈~

其實我地好變態，見人既問候，唔係問人食左飯未，而係，”o衣…..你好似瘦/肥左喎……”，又或者係，”喂…..我係咪好似瘦/肥左d呀最近……”

好恐怖，大家唔好學。

秋季日劇已經出街啦~ 醫龍 2 未睇，可能因為剛剛睇完n年前既白色巨塔，要比o的時候消化下。

長澤雅美既”二十歲的戀人”睇左2集，ok啦~長澤fans要睇咯……暫時係不過不失咁啦

“抺布女孩”…..睇左1集，ok。暫時未見有乜特別。 

“神探伽利略”有我鐘意既柴崎幸，所以必睇，但未開始。但睇故事大綱就唔expect太多。

上戶彩主演既”野蠻阿媽” ，attention please一貫風格，搞笑，但暫未見突出。

眾觀今季日劇，好似比上集失色左少少。反而睇大左夏季SP、廣末涼子既”長婚之路”又OK喎。其實我都OK鐘意廣末涼子，特別係近三年既作品，多左好多個人特色。再之前夏日雪個d就太普通，雖然佢可以做到好溫柔，但就無左個人風格。好似前男友做女強人、電影戀愛寫真既角色，都令我有幾深印象。我仲未睇”奇跡動物園2007″，因為係北海道旭山動物園取景，先吸引我去睇。其實日劇女角中我最鐘意既女優叫深津繒里，唔知係咪因為年紀大要退休，自對上一齣西遊記後，都有年多兩年無再見佢(註：2007年深津拍左西遊記既電影版)。西遊記我無睇，但2005年既slow dance係幾好睇。2007年既今日，姊弟戀算不上什麼，2005年，都算係一個新興話題。其實姊弟戀要追溯到2003年深津既另一套日劇末っ子長男姉三人(老么真命苦)。呢套又係好好笑，推介啊~