6月19日 作品：香芒椰汁糯米飯

原本係諗住放學後返屋企煮，結果走堂。咪提早返屋企整咯。

今次我第一次整，仲要係第一次整d有糯米既菜色，感覺上覺得自己仲未好控制到。所以煮多左米，同埋如果下次可以乾身少少會好dd，唔知係d米既問題定係我落多左水既問題。再要彈既係今次我為健康著想，係減左糖。但又好似落多左少少鹽，所以味道比係街到食既係淡，我相信係街食個d，應該係怒加糖架啦~ (肥死…!!) 但朋友仔話佢覺得呢佪味先o岩o岩好，所以好明顯係每個人口味問題。由於係米多左，又驚難消化，我地最後只係食左一半，有d浪費啦~ 但我下次會識得控制分量好d。

賣相就ok。黃黃白白咁，應該好難出錯。

食譜：

材料：
芒果一隻 (最緊要選d熟d既，樣衰個d就最o岩)
糯米一杯 (我今次落左差不多2杯，太多啦…浪費!!!)
細椰漿一罐 (糯米用一杯加一罐細椰漿就剛剛好)

1. 糯米先洗淨，再用水浸3-4小時。

2. 將浸好既糯米抺淨，加適量水，再隔水蒸15分鐘。芒果切粒備用。

3. 係蒸糯米既期間，可以預備開椰漿，分2半。其一半加1湯匙糖及少許鹽拌勻。

4. 待15分鐘後，將(3)的椰漿掍合物倒於糯米上，拌勻再蒸10分鐘至糯米全熟。拿出，放涼。

5. 將餘下既椰漿倒入鑊內微微加熱，一邊煮時一邊再加1湯匙糖、少許鹽、少許生粉(生粉可唔加)，直至糖煮溶。要注意煮椰漿時唔好比椰漿煮滾，因為煮滾既椰漿會釋出椰油，椰油對身體唔好。

6. 將粒粒芒果鋪好，再將(5)煮好左既椰漿淋上面即成。

原本今日要返學，但最終不敵走堂引誘。最搞笑係既然我想唔返學，又做乜坐地龍去到尖咀站呢？搞笑。既然都錯左，咁就決定留係尖咀食飯。

係諗唔到食乜野既情況下，我地去左諾士佛階。好日都唔去尖咀，真係諗唔到食乜好。咁醒起上次經過有間食日本野都好似幾ok，就決定去試下。

原來係食迴轉壽司既。服務員態度好，坐order枱，汲取上次去板長既錯誤經歷 (唔好意思，我地係anti-板系咯)，決定點少少試下。開首叫左三文魚腩、油甘魚腩、劍魚、立魚同2件松葉蟹腳。當然唔可以講得上係超級好味(起碼一定比唔上湖舟…oh…湖舟 i miss you…!!)，但以係去食比元氣板系既價格，可以食到咁既質素既壽司，已經算好唔錯, 起碼食松葉蟹腳個感覺唔係變左食蟹聊，而且d壽司飯無散，仲想點? 覺得ok後我地再點海葡萄、牛油果軟腳蟹、藍鯨吞拿魚等。仲點左個炸一口北海道芝士。

特別要講係呢個炸一口北海道芝士。超級推介。$28有三粒，好似少左d貴左d，但真係超好味。未食只係擺埋少少已經聞到好濃既芝士味，食入口又香又軟，完全無油膩感。絕對值5個讚。

最後埋單食左$260。個壽司飯比香港一般既迴轉壽司細，但其實呢個size先o岩。而且咪睇咁細，其實都ok飽，我地無食盡係因為要留番個肚今晚食甜品(詳見小敏大廚煮好餸(5))。

服務員態度好好，不停添水，食到中途又會幫我地換碟，

記得上一次經過，見係位處諾士佛階，而且裝修又咁靚，諗住應該好貴下，上次無食係因為已經食左飯。點知今次初黎步到，發現呢間野好味又抵食，服務態度又好，應該要推介。呢間<上壽司>，絕對有下次。(我地已經講左今個summer term尾最後一堂，一定會再黎) 唯一可惜係雖然係星期四，但點解到七八點，店內都無乜人呢……

上壽司
尖沙咀彌敦道132號美麗華商場諾士佛階1樓1號舖

2008年6月15日 作品：Bolognese Spaghetti (加上自家磨的pamesan cheese)

加埋cheese我覺得味道好好，覺得可改進地方係下次用cheddar cheese風味更佳。食到男友仔滯左……佢一個人食左2個人既portion……哈哈….

感謝普洱姐指導，我下次會加d 紅椒同埋加一滴醋試下架啦~~

又係跟通少既recipe整既。想睇原裝食譜睇呢到 (http://hk.myblog.yahoo.com/tony-karen/article?mid=16507&prev=16985&next=16194)

我用左扁意粉煮而唔係用螺絲粉，其實用乜粉整都係一樣既jei。不過係上次見整左carbonara之後用剩半個洋蔥，唔想浪費咪試下整咯。味道又幾得喎。

材料：
扁意粉
半個洋蔥切絲
garlic 5瓣切蓉 (我成日都覺得新鮮garlic整會比用李錦記整好個d蒜蓉好味好多，但如果你懶切都可以用個d代替)
番茄4隻切細粒 (原裝係普通切粒大粒d，但切細粒會好睇d又出味d)
碎牛肉半磅 (其實應該係mix 一d碎牛一d碎豬先最好味，但我懶。我去左超市買d一兜兜已經搞掂既免治牛肉，方便嘛~ 唔使走幾轉)
白磨菇 6 -7 粒 切片 (如果嫌貴去買罐頭磨菇都得，仲可以買d已經切片既就可以慳功夫，但我覺得都係用番新鮮白磨菇好d, 有口感又好味, 普洱姐話我下次可以將d香磨菇再一開二，咁就可以match番d 番茄既大小會好睇d喎)
碎香草 少許 (我無用香草，因為無又懶得買。遲下等我整我個招牌西炒飯先買啦)

汁料：
水 1/2 杯
茄汁 4 湯匙
糖 1湯匙
茄膏 3湯匙

1. 意粉按照盒上指示, 用鹽(約2-3湯匙鹽)水煲至煙韌程度, 隔去水, 加入2湯橄欖油撈勻待用 (圖1), 牛肉用鹽、糖、酒、生粉、油醃15分鐘

2. 快火落油起鑊, 先將牛肉炒至全熟, 盛起隔油備用

3. 快火落油起鑊, 先爆香蒜蓉至金黃, 加洋蔥用少去鹽炒至軟身, 加入蕃茄和磨菇, 加入1湯匙糖炒香, 加入汁料調好味, 再加入牛肉煮滾, 淋上意粉灑上香草即成

2008年6月8日 作品：小棠菜三文魚丸湯米粉

呢個真係超易整，基本上係掉晒所有野一鑊熟就得。連我男朋友完全唔識整野食我講佢知d step佢都整到，

材料：
米枌 (我用孔雀牌，一包有六個米粉，一個人食2個已經好飽。用水浸軟備用
小棠菜半斤至一斤、都係隨你喜愛 洗淨備用
三文魚丸 / 墨魚 / 獅子狗 / 蟹柳 / whatever 丸數粒 (隨你喜愛，最好早少少係雪櫃拿出黎解凍備用)
金華火腿 適量 切片
瘦肉10蚊 (因為我有用金華火腿，所以無買咁多瘦肉) 用糖鹽酒生粉油醃最少15分鐘
薑 2-3片

1. 開一鍋水加薑加金華火腿，煲滾後加已醃好既瘦肉

2. 待已加入瘦肉既湯再滾後，加小棠菜，蓋上蓋待小棠菜變軟煮熟

3. 加入丸丸，待丸丸浮起即可可米粉略煮至米粉變軟即成。

4. 可加鹽、soy souce、辣油等按個人喜好調味

2008年6月1日作品 — 鮮茄豬肉湯通心粉

食譜來源：村之飲飲食食事件簿 (http://hk.myblog.yahoo.com/clover_raymond/article?mid=21)

原食譜係湯意粉，但我估湯通心粉會易入口d，所以改左用通心粉整。

夏日炎炎，真係食飯都無乜胃口，更加唔係好想食肥膩野。咁o岩睇到呢個食譜，睇黎好似幾好味又開胃，就諗住試下啦。用半肥瘦豬肉、番茄製成既通心粉，完全無落茄膏，但湯底清甜，全煲一次過被K.O.!!! 正!!

食譜

意粉、番茄四隻、半肥瘦豬肉(2人份量我買左13蚊左右，少得滯個湯底唔夠味架，買個時同店員講要半肥瘦搞碎)、蛋(我今次最後無落蛋做蛋花，加唔加都咁好味)

1. 先滾水將通心粉加少許鹽按包裝指示煮熟，倒去熱水後，再加少許olive oil拌勻, 放進大碗內。

2. 用生抽、粟粉、糖、鹽、油、胡椒粉去醃免治豬肉; 番茄一開四切開

3. 開水，我加左片薑，再加番茄，將番茄煮至溶爛，之後放入己醃好的兔治豬肉。

4. 關火後放入已攪拌好的蛋作蛋花

5. 將煲好的湯底倒入已放通心粉既碗內即成。

新節目，小敏大廚煮好餸。

話說最近迷上煮飯。最近2個月已經煮左好多好野食。

係(1)之前本來仲有個前傳架~ 但因為唔記得影相，所以無得寫啦。前傳係整梅菜蒸肉餅配上湯粉絲娃娃菜。

講番個(1)先。今次整左金華火腿配玉子豆腐釀節瓜同埋黑椒蜜糖雞冀。

wah~ 係咪好似好好食咁呢?

當然呢2個餸都有少少失敗既。

首先講呢個金華火腿配玉子豆腐釀節瓜。係咪睇上去好似d節瓜未熟透仲生生地咁呢？我整個時都以為未夠拿去翻蒸。後來先理解其實係個蒸汽microwave既問題。整個時因為見有蒸汽microwave咁方便，而且上次蒸肉餅都無問題，咁諗住用可以慳時間啦。點知就出事啦~ 原來整瓜呢d會有缺憾呀。但個味道係ok。節瓜同玉子豆腐都味淡，配金華火腿，味道就清新。而且紅紅綠綠咁，賣相都幾靚。

食譜：

節瓜一條
玉子豆腐一條
金華火腿

1. 將節瓜洗淨，用小刀刮乾淨表面, 然後將節瓜切件，每件大約3cm厚

2. 金華火腿切成蓉，加少許糖，隔水蒸10分鐘, 拿出備用。

3. 用小刀切走節瓜中間嘅芯，將玉子豆腐切開，然後將玉子豆腐放上節瓜個芯度位

4. 將少少粟粉搽喺個節瓜中間個圈，然後切玉子豆腐適當高度，然後放入節瓜圈入面

5. 煲一滾水，隔水蒸大約10分鐘

6. 蒸熟後，將d節瓜水倒出，然後倒入鑊，加入金華火腿蓉，用中火去煮，加入半茶匙雞粉及少許鹽，煮溶後加入生粉水做個獻汁，最後淋上節瓜甫上面。

黑椒蜜糖雞冀，我係跟通少個recipe。味道整。我地2個人清晒12隻。唯一係我落多左蜜糖，同埋醃黑椒既時間唔太夠。我平時多數整黑椒雞冀，個人偏好黑椒味勁d。睇相好似一pat黑色咁，但實物ok d架。而且我仲係用手機影，係差少少架啦….

食譜來源：通之廚房 (http://hk.myblog.yahoo.com/tony-karen/article?mid=10415)

材料：
12隻雞中冀
蜜糖2湯匙 (<-- 我覺得太甜，下次用一湯匙都應該夠)

醃料：
黑胡椒
蠔油 3茶匙
garlic salt 1湯匙 (<-- 我屋企無，用左2瓣細既garlic切蓉代替)
老油2茶匙
糖1湯匙
油、水、生料 各適量

1. 雞冀用醃料醃20分鐘，再快火無油煎至金黃

2. 加熱水至蓋過雞冀的2/3，蓋上蓋焗10分鐘至雞冀全熟，開蓋把汁蒸發至乾身 (我只係用左普通室溫開水，無用熱水，但屋企個火夠猛所以都掂。建議屋企個爐唔夠猛火既真係最好用熱水會好d)

3. 熄火，加入蜜糖兜勻上碟。

 

昨晚(5月29日)約左MAJSP既朋友仔一齊食飯。原先諗住去吉列豬但我地太遲約啦, 一定訂唔到位, 想book一門又話無位。結果我係openrice到search話呢間石山正。結果，都令我幾失望。

我第1次打電話黎時話訂三位，後尾男朋友都話想join就打電話去改四位。第二次打電話去(用日文訂位)，對方竟然話無我之前三位個booking。Ok, 都算~ 起碼都叫做book到位。

位置係銅鑼灣駱克道一商業中心一樓，唔算難搵。可能上次生日飯去食湖舟感覺太好啦~ 去到見到d裝修都覺得”下……乜咁殘咁舊既?!”既感覺。去到坐低, d位好唔舒服，係好似卡位既U型位，但無”pan”, 真係坐得幾唔舒服下。

坐低waitress拿左menu黎，嘩！想像唔到, 有紅點既係是日無供應，佔左半張紙咁滯。我話有冇menu呀? 原來個張係點前菜。Ok。menu係日文一早預左, 好彩我地在坐四個人都識日文。

點左三個前菜，個豆腐幾好食，但個花螺同菜就好一般。叫左壽司。之前d食評話d壽司好得，咪諗住試下咯。點知真係唔多掂，我覺得好過去食元氣少少，但個5碟壽司(包括海胆、三文魚、三文魚子、帶子和油甘魚)，埋單成四百幾五百。去湖舟食assorted，有埋中拖攞，人地仲要新鮮好多好多倍。仲點左泡菜炒豬肉，ok，不過不失。海胆天婦羅，用紫蘇葉包住海胆炸，幾特別，幾好食，但多少有d貴。百二蚊得四小條，抵唔抵見仁見智。

廣島燒算ok。

鍋燒烏冬同個素麵都ok好食既。

服務態度一般，我感覺唔到之前寫食評講個種親切。相比之下，湖舟食真係好細心好有誠意(仲未得閒寫湖舟既食評，因為有相未得閒LOAD番去電腦到)。呢間石山hea到我都唔想影相，可想而之佢既吸引力……

 

埋單1070, 平均每位270。呢個價話貴唔貴話平唔平，比得呢個價，我情願比多少少去湖舟食，開心好多。